Autora, e un mudjer rumantika, na kada un di si puema letoris ta viaja instantaniamenti, maioria di si poema ta ritrata amor, dizeju, sodadi, lenbransa, sufrimentu, dor, melankulia, suplika i tanbe el ta labanta auto-estima di mudjer.

Tudu es sentimentus ta fasi es livru ser maraviliozu. N ta agradisi autora pa es privilejiu k’e oferese-m di le es livru.

N vivi kada palavra, N inkanta ku kada versu, N xinti kada poema navega pureza di nha aima, es transporta-m alen di orizonti, rimas suri ku mi, ritimus dansa na nha pensamentu, imajis disfila na nha oliar, metafura manda-m beju di ves en kuantu i koktel di tudu es figura di stilu fasi di es livru li un jardin kuloridu.

Na es livru N diskubri un ar sentimental, rumantiku xeiu di viaji, i kela ta mostra ma autora di es livru e un grandi skritora.

N ta agradisi Claudina da Silva Moreira, di fundu di nha korason pa kunfiansa k’e fase-m, kunfiansa di mostra-m ninhu di si petu, es livru ki N perta na mi ku amor sima mai ku fidju, obrigada i grandi abrasu puetiku.

Andreia Tavares de Sousa (Puetiza i difensora di nos lingua kabuverdianu).